Sələf Xəbər


AZƏRBAYCAN XƏBƏRLƏRİ, SON XƏBƏRLƏR

 Son Xəbərlər

Yaralı neftçi: “Hamı “la ilahə illəllah” deyirdi”

Dekabr 08
17:18 2015

“Axşama yaxın idi. Düşünürdük ki, bir azdan yeməyə gedərik. Elə bu vaxt dəhşətli partlayış baş verdi və hər tərəfi güclü tüstü bürüdü”.

“Sələf Xəbər” Savash.org-a istinadən bildirir ki, bunu “Günəşli” yatağında baş verən yanğından xilas edilən və hazırda Neftçilər xəstəxanasında müalicə alan konstruksiya və qazma işləri trestinin energetiki Ənvər Əliyev deyib.

Ölümün cəngindən xilas edilən neftçi fırtına günü başlayan yanğın zamanı olanlardan danışıb. Ə.Əliyev deyib ki, partlayış səsi eşidildikdən sonra platformanın şərq tərəfindəki qayıqlara tərəf qaçmağa başlayıblar. Lakin güclü yanğın onların yolunu kəsib. Daha sonra onlar şimal istiqamətində olan qayıqlara minməyə başlayıblar.

“İki qayıq var idi. 62 nəfər həmin qayıqlara mindi. Bir nəfər isə yuxarıdan qayığı aşağı sallayırdı. O, düşə bilmədiyi üçün yuxarıda qaldı. Biz burada öyrəndik ki, bizi aşağı sallayıb, özü yuxarıda qalan iş yoldaşımız sağ qalıb. Ancaq o çoxsaylı yanıq xəsarətləri alıb. Biz aşağı endiyimizdə çox güclü dalğa var idi. Qayıqları sudan bir neçə metr yüksəklikdə saxladıq. Dalğalar bizi vursaydı sağ qalmaq şansımız yox idi”.

Hadisənin dəhşətini tam şəkildə yaşayan Ə.Əliyev deyir ki, havadan asılı qalan qayıqlar güclü küləyin təsirindən bir neçə dəfə platformaya çırpılıb. “Qayıq üçünçü dəfə platformaya çırpılanda parçalandı və 3 nəfərdən başqa hər kəs suya tökülüb. O üç nəfər də qayıq parçalanan zaman tullanaraq platformanın dəmir hissəsindən tutdular. Onlardan ikisi bu gün sağdır, xilas edilib. Bir nəfər isə dəmir parçasından tuta bilmədi və suya düşdü. Qayıq parçalananda 7 nəfər ən böyük hissənin üzərində dənizə düşdü. Onlardan biri də mən idim. Sevindik ki, sağ qalmaq ehtimalımız var. Mən özünü belimdəki kəmərlə həmin parçaya bağladım. Daha sonra güclü dalğa həmin parçanı da çevirdi və hər kəs suların arasında itdi.Yoldaşlarımızı sular harasa apardı. Mən isə özümü o hissəyə bağladığım üçün batmadım və köməyə gələnlər məni xilas etdilər”.

Özülün rəisi Allahverdi İmran oğlu Məmmədov isə deyir ki, partlayış baş verən vaxt insanlar həyəcandan özlərini dənizə atmaq istəyib, lakin o bunun qarşısını alıb.

“Hadisə barədə əvvəl rəhbərliyə məruzə etdim. Bildirdim ki, burada qalsaq həyatımızın sonu olacaq. Daha sonra bütün işçilərə batmamaları üçün gödəkcələr geyindirdik və qayıqlara mindirdik. Bizim insanları qayıqlara mindirməkdə məqsədimiz onların tüstüdən zəhərlənməsinin və yanmasının qarşısını almaq idi. İki qayığı da suya endirdik. Bir neçə dəqiqə sonra qayıqlardan biri parçalandı”.

A.Məmmədov birinci qayığın da estakadanın reysləri arasında ilişib qaldığını və bu sayədə havadan asılı qaldıqlarını deyib.

Xilas edilən neftçilər təhlükə zamanı hər kəsin bir ağızdan “Lə iləhə illallah” deyə bağırdıqlarını deyirlər.

Sələf Xəbər: Uca Allah buyurur: “Hər kəs ölümü dadacaqdır. Biz sizi sınamaq üçün şər və xeyirlə imtahana çəkirik. Siz ancaq Bizə qaytarılacaqsınız!” (Qurani-Kərim, “Ənbiya” surəsi, 35-ci ayə)
“Ölüm bütün məxluqların nəsibidir. Bu bir piyalədir ki, onu hər kəs, hətta o, uzun ömür yaşasa da belə, içməlidir. Uca Allah Öz qullarını yerdə xəlq etmişdir, onlara hökmlər və qadağalar nazil etdikdən sonra isə onları xeyir və şərlə, var-dövlət və yoxsulluqla, qüdrət və alçaldılma ilə, həyat və ölümlə imtahana çəkir. Uca Allah buyurur: “Mülk Əlində Olan nə qədər xeyirxahdır. O hər şeyə qadirdir. Əməl baxımından hansınızın daha yaxşı olduğunuzu sınamaq üçün ölümü və həyatı yaradan Odur. O, Qüdrətlidir, Bağışlayandır!” (Qurani-Kərim, “Mülk” surəsi, 1,2-ci ayələr)

Yaralı neftçilərə Allahdan şəfa diləyirik. Amin!

Digər xəbərlər