Sələf Xəbər

Bir qrup çeçenistanlı qız sosial şəbəkələrdə İŞİD xəvaric terror qruplaşması üzvləri ilə yazışaraq, onların dəstələrinə qoşulmaq vədi ilə hesablarına xeyli miqdarda “bilet” pulu köçürülməsinə nail olub.

“Sələf Xəbər”in Lifenews.ru-ya istinadən məlumatına əsasən, Çeçenistan polisi şübhəli bilinən qızlardan üç nəfəri tutub.

Şübhəli qızlardan biri İŞİD terror xəvaric qruplaşması üzvlərinə qoşulacağı vədi ilə onları aldadaraq 45 min rubl qoparıb. Qızın sözlərinə görə, bir neçə ay əvvəl sosial şəbəkədə Suriyadan olan naməlum şəxsdən məktub alıb. Bir müddət yazışdıqdan sonra həmin şəxs qıza təklif edib ki, hər şeydən vaz keçib döyüşçülərin arasında yeni həyata başlasın. Suriyaya getmək üçün vəsaitinin olmadığını bildirən qıza 10 min rubl məbləğində pul göndərib. Pulları hesabından çıxartdıqdan sonra çeçen qız sosial şəbəkədəki səhifəsini bağlayıb və yazışmanı dayandırıb.

Növbəti dəfə çeçen qıza İŞİD terror xəvaric qruplaşması üzvlərinə qoşulmaq üçün daha iki təklif gəlib. Bu dəfə də onun hesabına ayrı-ayrılıqda 15 və 20 min rubl köçürülüb. Əvvəlcə İŞİD terror xəvaric qruplaşması üzvlərinə qoşulmağı düşünsə də daha sonra ordakı qızların naməlum taleyini göz önünə gətirərək fikrindən vaz keçib.

Çeçenistanda ekstremistlərə və terror qruplara qarşı mübarizə mərkəzi mütəmadi olaraq internetdəki yazışmalara nəzarət edir. Onlar tərəfindən ekstremistlərlə yazışan bir çox şəbəkə hesabları aşkar olunub. Hətta yazışan fırıldaqçılar arasında yalnız qadınlar yox, həm də özlərini müsəlman qadın kimi təqdim edən kişilər də var.

Artıq bu üsulla terrorçularla əlaqəyə girən fırıldaqçılara qarşı tədbirlər görülür. Dələduzluq edənlər üçün minimum cəza cərimələnmək, maksimum cəza isə 6 il azadlıqdan məhrum edilmək olacaq.