Sələf Xəbər

“Avrasiya İqtisadi İttifaqına yeni üzvlərin qəbul edilməsini alqışlayırıq. Hazırda Tacikistanın təşkilata daxil olması məsələsinə baxılır”.

Selefxeber.az-ın “Sputnik.az”a istinadən məlumatına görə, bu açıqlamanı Rusiyanın xarici işlər naziri Sergey Lavrov verib. ADA Universitetində tələbələr və müəllim heyəti ilə görüşü zamanı Lavrov deyib ki, Aİİ-yə MDB üzvü olmayan ölkələrdən də müraciətlər gəlir.

“Azərbaycanı da bu təşkilatda görməkdən çox məmnun olarıq” — Rusiya XİN rəhbəri bildirib.

“Avrasiya İqtisadi İttifaqı açıq inteqrasiya birliyidir. Biz heç kəsə bu təşkilata daxil olmağı diqtə etməmişik” — o, əlavə edib.

S. Lavrov Rusiya — ABŞ münasibətləri və Dağlıq Qarabağ münaqişəsinə də toxunub: “Bu məsələdə Rusiya ABŞ və Fransa ilə ümumi mövqeyə malikdir. Həmsədrlər, səfirlər nazirlərlə görüşürlər, mütəmadi regiona səfər edirlər”.

“ABŞ-la Rusiya arasında münasibətlərin bəzi sahələrdə dalana dirənməsinə baxmayaraq, bu münasibətlər Dağlıq Qarabağ münaqişəsinin həlli sahəsində əməkdaşlığa təsir etmir” — o vurğulayıb.

Lavrov ümid etdiyini bildirib ki, pezidentlər arasında keçən ay keçirilən görüş münaqişənin həlli istiqamətində irəli addım atmağa kömək edəcək.