Ankara və Moskva Suriya məsələsində razılığa gəldi
1. 247 dəfə baxılıb
Türkiyə və Rusiya Suriyada atəşkəsin əldə olunması barədə ümumi razılığa gəlib.
Selefxeber.az “Anadolu” agentliyinə istinadən xəbər verir ki, iki ölkə arasında Suriyadakı bütün tərəflərə təqdim olunacaq atəşkəs şərtləri barədə razılıq əldə olunub.
Atəşkəsin bu gecədən icra edilməsi hədəflənir. Ankara və Moskva tərəflərin atəşkəsə riayət etməsi üçün çalışacaq. Terror təşkilatları isə atəşkəs razılaşmasına daxil edilməyəcəkdir. Yəni onlara qarşı mübarizə davam edəcək. Atəşkəsin uğurlu olacağı təqdirdə, rejim və müxalif qüvvələr Türkiyə və Rusiyanın iştirakı ilə Astanada siyasi müzakirələrə başlayacaqlar. İki ölkə atəşkəsin qarantı olaraq çıxış edəcəkdir.
Sələf Xəbər: Uca Allah buyurur: “Əgər onlar sülhə meyl etsələr, sən də ona meyl et və Allaha təvəkkül et! Həqiqətən, O, Eşidəndir, Biləndir.” (Müqəddəs Quran, “Ənfal” surəsi, 61-ci ayə)
Nüfuzlu Quran təfsirçisi, Əbdurrahman Əs-Saadi (Allah ona rəhmət etsin) bu ayəni şərh edərkən demişdir: “Sənin əleyhinə döyüşən kafirlər sülh müqaviləsi imzalamaq və döyüş əməliyyatlarına son qoymaq istəsələr, sən də sülh müqaviləsi imzalamağa razılaş və Allaha təvəkkül et! Həqiqətən, sülh sazişi bağlamaq böyük fayda gətirə bilər.
Birincisi, müsəlmanlardan həmişə sülhə və əmin-amanlığa can atmaq tələb olunur və əgər kafirlər birinci olaraq sülh bağlamaq arzusunu bildirirlərsə, müsəlmanlar bu təşəbbüsü müdafiə etməlidirlər.
İkincisi, döyüş əməliyyatlarına son verilməsi müsəlmanlara öz qüvvələrini toplamağa və zərurət yarandıqda növbəti döyüşlərə hazırlaşmağa imkan verir.
Üçüncüsü, sülh müqaviləsi imzalandıqdan sonra, düşmənçilik edən tərəflər bir-birini hədələməkdən vaz keçirlər və bir-birilərinin baxışları ilə daha yaxşı tanış ola bilərlər. İslam həmişə digər dinlərdən üstünlük əldə edir və heç bir din ona qalib gəlməyə qadir deyil. Buna görə hər bir ağıllı və sağlam düşüncəli insan İslam dinini qərəzsiz öyrənərsə, hökmən başqa dini əqidələrdən məhz ona üstünlük verər, axı İslam özünün gözəl hökmləri və müdrik qadağaları ilə fərqlənir, məxluqlara ədalətli və mehriban münasibət bəsləməyi öyrədir. Bu dində zülm etməyə və sıxıntı verməyə yer yoxdur və buna görə sülh sazişinin bağlanması İslamı qəbul etmək və ona etiqad göstərmək istəyənlərin sayının artmasına səbəb olur. Bu isə o deməkdir ki, sülh şəraitində yanaşı yaşamaq müsəlmanlara kafirlər üzərində qələbə çalmağa kömək edir.” (Bax “Təfsir Əs-Saadi”)
