Yaponiyada Azərbaycandan danışıldı
820 dəfə baxılıb
Mərasimdə Azərbaycanın etibarlı tərəfdaş kimi beynəlxalq münasibətlər sistemində özünü doğrultduğu diqqətə çatdırılıb.
Yaponiyanın Hakiyogi şəhərində Azərbaycan haqqında təqdimat iştirakçılar tərəfindən böyük maraqla qarşılanıb.
“Sələf Xəbər”in “A24.az”-a istinadən məlumatına görə, Hakiyogi Beynəlxalq Assosiasiyasının təşkil etdiyi tədbirdə Azərbaycanın Yaponiyadakı səfirliyinin əməkdaşı Fuad Bağırov və elektronika sahəsində tanınmış alim, əslən azərbaycanlı Xəlil Kələntər iştirakçılara ölkəmiz haqqında ətraflı məlumat veriblər.
Ölkəmizin qədim sivilizasiyaların qovşağında yerləşdiyi, zəngin mədəniyyətə malik olduğu bildirilib, müasir Azərbaycanın uğurları barədə məlumat verilib. Azərbaycanın dövlət atributları, coğrafi mövqeyi, təbiəti, əhalisi, dini tolerantlığı, iqtisadiyyatı, enerji siyasəti barədə də tədbirdə geniş danışılıb. XX əsrin əvvəllərində Azərbaycan Xalq Cümhuriyyətinin yaranması barədə məlumat verən qonaqlar onun müsəlman Şərqində ilk demokratik parlamentli respublika olduğunu bildirərək, 1991-ci ildə Azərbaycanın öz müstəqilliyini bərpa etdiyini vurğulayıblar.
Müstəqilliyini bərpa etdikdən sonra Azərbaycanın dünya birliyinə inteqrasiyası istiqamətində uğurları, xüsusilə də, Bakı-Tbilisi-Ceyhan neft, Bakı-Tbilisi-Ərzurum qaz boru kəmərləri, Bakı-Tbilisi-Qars dəmir yolu, TAP və TANAP layihələri, Şərq-Qərb, Şimal-Cənub nəqliyyat dəhlizləri kimi beynəlxalq iqtisadi layihələrdə ölkəmizin aparıcı mövqeyi diqqətə çatdırılıb.
Azərbaycanın dünyada artan nüfuzu, Avropanın enerji təhlükəsizliyinin təmin edilməsindəki əhəmiyyətli rolu haqqında danışan qonaqlar, hökumətin qeyri-neft sektorunun inkişafına xüsusi diqqət yetirdiyini vurğulayaraq sənaye, turizm, kənd təsərrüfatı, alternativ və bərpa olunan enerji mənbələri sahələrində geniş imkanların mövcudluğunu bildiriblər.
Mərasimdə Azərbaycanın etibarlı tərəfdaş kimi beynəlxalq münasibətlər sistemində özünü doğrultduğu diqqətə çatdırılıb, ölkəmizin 2012-2013-cü illər üçün BMT Təhlükəsizlik Şurasına qeyri-daimi üzv seçilməsinin bunun bariz nümunəsi olduğu vurğulanıb.
Təqdimatda Ermənistan-Azərbaycan, Dağlıq Qarabağ münaqişəsinin tarixi və ağır nəticələri barədə ətraflı məlumat verilib. Münaqişə nəticəsində xarici havadarlarına arxalanan Ermənistanın Azərbaycan ərazisinin 20 faizdən çoxunu işğal etməsi, bir milyondan çox insanın ata-baba yurdlarından didərgin düşməsi haqda da danışılıb.
Sonda iştirakçıların sualları ətraflı cavablandırılıb.
Sələf Xəbər: Uca Allah buyurur: “Əgər şükür etsəniz, sizə (olan nemətimi) artıraram, yox əgər nankorluq etsəniz, (bilin ki,) Mənim əzabım şiddətlidir.” (Qurani-Kərim, “İbrahim” surəsi, 7-ci ayə)
“Allaha şükr edən hər kəs, daha artıq nemətə nail edilir. Əksinə, kim ki, Allahın xeyirxahlığına naşükürlük göstərirsə, özünü sərt cəzaya məhkum edir ki, bunun da bir qismi – Allahın mərhəmətindən məhrum olmadır. Allaha minnətdarlıq bildirmək, yəni şükr etmək üçün bütün qəlbi ilə Onun mərhəmətini etiraf etməlidir”. (Bax: “Təfsir Əs-Saadi”)
