Sələf Xəbər

Martın 25-də saat 01.30 radələrində Daxili İşlər Nazirliyinin (DİN) Əlahiddə Çevik Polis Alayının əməkdaşları tərəfindən paytaxtın Nəsimi rayonunda Bakı Metropoliteninin havalandırma sisteminin borusu ilə həmin obyektə keçmək üçün orada olan dəmir barmaqlıqları xüsusi alətlə kəsmək istəyən Belarus Respublikasının vətəndaşı İlyevskiy Sergey Timofeyeviç saxlanılıb.

“Sələf Xəbər”in AZƏRTAC-a istinadən məlumatına görə, Respublika Daxili İşlər Nazirliyinin və Baş Prokurorluğunun mətbuat xidmətlərinin daxil olan birgə məlumatında bildirilir ki, hadisə yerindən metroda istifadə edilən bir ədəd qapı açarı, əlcək, alın fənəri, müxtəlif uzunluqda iki kəndir, 10 ədəd boya balonu, rəng püskürən 12 balon başlığı, “Nikon” markalı dayağı olan fotoaparat, başa bərkitmə mexanizmli “Sony” markalı videokamera götürülüb. S.İlyevskinin üzərinə baxış nəticəsində onun Tbilisi, Yerevan metrolarının stansiyalarında və depolarında çəkdiyi şəkillər, bu obyektlərin, eləcə də Bakı Metropoliteninin sxemi, mobil telefon və pul aşkarlanıb.

Belarus Respublikasının Azərbaycandakı səfirliyinin əməkdaşlarının yaxından iştirak etdiyi ilkin araşdırma zamanı S.İlyevskiy havalandırma sisteminin borusunda olan dəmir barmaqlıqları kəsməklə metropolitenin tunelinə daxil olmaq və divarlara qrafiti üslubda rəsmlər çəkmək istədiyini bildirib. Bununla belə, S.İlyevskinin 2016-cı il martın 18-də Belarusdan Gürcüstana, iki gün sonra Gürcüstandan Ermənistana getməsi, martın 23-də yenidən Gürcüstana qayıdaraq oradan Azərbaycana gəlməsi müəyyənləşdirilib.

Fakt üzrə zəruri araşdırmalar davam etdirilir.