Nazir: “İDEX-2015 sərgisində təkliflər də aldıq”
635 dəfə baxılıb
Abu Dabidə keçirilən beynəlxalq müdafiə sərgisi başa çatıb.
Birləşmiş Ərəb Əmirliklərinin paytaxtı Abu Dabi şəhərində keçirilən İDEX-2015 beynəlxalq müdafiə sərgisi başa çatıb.
“Sələf Xəbər” “A24.az”-a istinadən xəbər verir ki, dünyanın müxtəlif ölkələrindən şirkətlərin qatıldığı sərgidə Azərbaycanı Müdafiə Sənayesi Nazirliyi (MSN) də stendlə təmsil olunub.
MSN-in stendində Azərbaycan müəssisələrində istehsal olunmuş 180-dən artıq məhsul, o cümlədən atıcı silahlar, artilleriya sistemləri, pilotsuz uçuş aparatları, müxtəlif çaplı döyüş sursatları və s. təqdim edilib.
Sərgidə Azərbaycan istehsalı olan atıcı silahlar və döyüş sursatları xarici ölkələrin hərbçiləri tərəfindən maraqla qarşılanıb.
Azərbaycanı müdafiə sənayesi naziri Yavər Camalov açıqlamasında deyib ki, sərgi MSN üçün əhəmiyyətli olub. Sərgi çərçivəsində bir sıra xarici şirkətlərlə birgə müəssisənin yaradılması, təcrübə mübadiləsi, birgə istehsal və ixracat barədə razılıqlar əldə olunub.
“Sərgi çərçivəsində bir neçə ölkədən məhsul ixracı barədə təkliflər də aldıq”, – deyə nazir əlavə edib.
Nazir ərəb regionu bazarına çıxış üçün imkanların, eləcə də bu ölkələrdən maraqların olduğun qeyd edib.
Qeyd edək ki, Azərbaycan MSN İDEX sərgisinə ikinci dəfədir qatılır. Bundan əvvəl – 2011-ci ildə MSN İDEX sərgisində stendlə təmsil olunub.
Sələf Xəbər: Uca Allah buyurur: “(Düşmənlərə) qarşı bacardığınız qədər qüvvə və döyüş atları hazırlayın ki, bununla Allahın düşmənini, öz düşməninizi və onlardan başqa sizin bilmədiyiniz, lakin Allahın bildiyi kimsələri qorxudasınız”. (Qurani-Kərim, “Ənfal” surəsi, 60-cı ayə)
