Dini ədəbiyyata və dərman vasitələrinə tətbiq ediləcək aksiz markasının qiyməti açıqlandı
778 dəfə baxılıb
Dərman vasitələri üçün nəzarət markalarının qiyməti digər kateqoriyalı mal və əsərlərə verilən nəzarət markaları üçün müəyyən edilmiş vahid qiymətdən 15 dəfə ucuz olacaq.
Nazirlər Kabineti “Nəzarət markasının alınmasına görə ödənilən haqqın məbləği”nin təsdiq edilməsi barədə” qərarında dəyişiklik edib.
“Sələf Xəbər”in APA-ya istinadən məlumatına görə, indiyə qədər qüvvədə olan “Nəzarət markasının alınmasına görə ödənilən haqqın məbləği”nin təsdiq edilməsi barədə” qərara əsasən nəzarət markası verilən nüsxələrin növləri kimi audiovizual, fonoqram, kompyuter proqramı, məlumat toplusu və kitab nüsxələri müəyyən edilib və 1 iyul 2014-cü ildən 1 nəzarət markasının alınmasına görə vahid qiymət, yəni 15 qəpik ödənilib. Dəyişikliyə əsasən nəzarət markası verilən nüsxələrin növləri sırasına ayrıca dərman vasitələri və dini təyinatlı nüsxələr əlavə edilib. Dərman vasitələrinin bir nüsxəsi üçün veriləcək nəzarət markalarının 1 ədədinin qiyməti 1 qəpik, dini təyinatlı vasitələrin (kağız və elektron daşıyıcılarda dini ədəbiyyat, audio və video materiallar, mal və məmulatlar və dini məzmunlu başqa məlumat materialları) bir nüsxəsi üçün veriləcək nəzarət markalarının 1 ədədinin qiyməti 2 qəpik müəyyən edilib.
Xatırladaq ki, Nazirlər Kabinetinin 1 iyul 2015-ci il tarixdə “Nəzarət markasının forması, uçotu, istifadəsi və verilməsi Qaydaları”na etdiyi dəyişikliyə əsasən dərman vasitələri və dini təyinatlı vasitələr üçün nəzarət markaları artıq Müəllif Hüquqları Agentliyindən yox, müvafiq olaraq Səhiyyə Nazirliyi və Dini Qurumlarla İş üzrə Dövlət Komitəsindən alınacaq.
Sələf Xəbər: Məhəmməd peyğəmbər (Allahın ona salavat və salamı olsun) buyurmuşdur: “Elm tələb etmək hər bir müsəlmana fərzdir!” (İbn Macə)
Məhəmməd Peyğəmbər (Allahın ona salavat və salamı olsun) buyurmuşdur: “Allah elə bir xəstəlik göndərməyib ki, onun müalicəsini göndərməsin”. (Buxari)
