Sələf Xəbər

“Sələf Xəbər”-in azstand.gov.az-a istinadən məlumatına görə, 3-9 sentyabrda Malayziyanın Putrajaya şəhərində Texniki Əməkdaşlıq Proqramı çərçivəsində “Halal standartlar və İslam ölkələri üçün uyğunluq infrastrukturu” mövzusunda təlim keçirilib.

Təlimdə “Malayziya standartlarına qısa baxış”, “Kosmetik vasitələr və şəxsi gigiyena vasitələri”, MS 1900:2014 “Şəriət qaydaları bazasında keyfiyyətin idarə edilməsi sistemləri”, MS 2400:2010 “Malların daşınmasının idarəetmə sistemləri”, MS 2424:2012 “Halal əczaçılıq – Ümumi qaydalar” standartları, Malayziyada halal sertifikatlaşdırma prosesi, sertifikatlaşdırmanın ümumi qaydaları, yoxlanılmalı olan kritik nöqtələr, xarici sertifikatlaşdırma qurumlarının tanınması, halal sertifikatlaşdırma prosesinin sxemi, auditin aparılması, sertifikatlaşdırma xərcləri, şəriət və texniki auditlərə olan tələblər və s. mövzular ətrafında müzakirələr aparılıb.

Sonra Malayziyanın “halal qida və gigiyenik vasitələr” istehsalı ilə məşğul olan iri şirkətlərin mövcud vəziyyəti, o cümlədən Malayziya Texniki Parkında Halal Test Mərkəzi ilə tanışlıq olub. Təlimdə Azərbaycan Respublikasının Standartlaşdırma, Metrologiya və Patent üzrə Dövlət Komitəsinin əməkdaşları iştirak edib.